واقع لابد من مواجهته : أحداث العباسية سببت خسائر رهيبة للثورة ولكل من يمثلها ، من اول الثوار ، لمرشحي الرئاسة الثوريين ، مرورا بالأحزاب السياسية الضعيفة ، وحتى البرلمان المشكوك في ثوريته
ومن الضروري دلوقتي اعادة تقييم الأمور ونشوف الضروري ونعمله ، خلونا نجاوب على 3 أسئلة
1.المجلس العسكري عايز يطلع بايه تحديدا من المرحلة الانتقالية؟
2.احنا - كثوار - عايزين نطلع بايه ؟
3.ايه اللي ممكن اعمله كفرد عشان نحقق أكبر قدر من اللي عايزينه؟او على الاقل نحقق الضروري منها؟
هجاوب على اول سؤالين على حد فهمي وفهم الناس اللي سألتهم ، والسؤال التالت متروك لكل واحد يقول اللي يقدر عليه
.المجلس العسكري عايز يطلع بايه تحديدا من المرحلة الانتقالية؟
.المجلس العسكري عايز يطلع بايه تحديدا من المرحلة الانتقالية؟
أولا :عايز امان من المحاكمة على المخالفات المالية والإدارية في المشروعات المتعلقة بالجيش (تقريبا خدها خلاص)
ثانيا: عايز وضع خاص يسمح له بالتدخل في السياسات الخارجية (يحافظ على امن مصر القومي من وجهة نظره ، وده يتضمن استمرار التبعية لأمريكا وما خفي كان أعظم
وده ممكن يحققه بطريقتين ، يا إما وضع خاص في الدستور ، ياإما رئيس عسكري زي شفيق ، او مماليء زي موسى
ثالثا :عايز استمرار احتكار الجيش لبعض مجالات الإقتصاد ، وتحقيقه لأرباح من مجالات تانية مرتبطة بقربه من السلطة زي المقاولات والسياحة
رأيي إن النقطة التانية هي الأهم ، ولو مقدرناش نمنع الجيش من تحقيقها دلوقتي ، يبقى مش هنقدر أبدا
انما النقطتين التانيين ممكن المفاوضة فيهم
2.احنا - كثوار - عايزين نطلع بايه ؟
أولا :سيادة كاملة للسلطة المدنية المنتخبة ، بدون اي تدخل من العسكر في اي قرارات او سياسات داخليا وخارجيا ، عن طريق دستور محترم ورئيس ميخافش يطبقه
ثانيا : تحقيق العدالة الانتقالية (قضايا قتل واعتقال الثوار)
(طبعا دي مطالبنا خلال المرحلة الانتقالية بس ، يعني مش من ضمنها الحاجات اللي عايزينها تتحقق في البلد بشكل عام زي رجوع الأمن واصلاح الإعلام والعدالة الاجتماعية ، كل ده هنعمله لو حققنا اهدافنا من المرحلة الانتقالية))
وظني هنا ان النقطة الاولى هي الاهم طبعا ، لو محققناهاش يبقى معملناش اي شيء
،اذن ، إزاي نضمن تحقيق السيادة الكاملة للسلطة المنتخبة ، وفي نفس الوقت نمنع العسكر من انه يكون ليه أي أثر في ادارة
شئون الدولة؟
فيه قدامنا وسيلتين
الاولى : وصول رئيس من أهل الثورة ، مش شفيق ولا موسى
الثانية : عدم النص على اي وضع خاص للجيش في الدستور
عشان نحقق الاتنين دول ، لازم يحصل سيناريو من اتنين:
الاول : القوى السياسية تسترجل وتتفق على مطلب واحد بألغاء المادة 28 وتشكيل لجنة جديدة للانتخابات الرئاسية لمنع التزوير او التلاعب بإستبعاد المزيد من المرشحين
الثاني : نتأكد من وصول رئيس ثوري للرئاسة ، وعدم وصول شفيق أو موسى
سواء بأننا نضغط على القوى السياسية لدعم مرشح واحد ، او نضغط على الشارع لعدم ترشيح الفلول
طبعا لو القوى السياسية احترمت نفسها ، كان زمان الوضع غير الوضع ، لكن بما أننا فقدنا الأمل في اتفاقهم على شيء ، خلونا نتكلم
عن "مسؤوليتنا" كأفراد
3.ايه اللي ممكن اعمله كفرد عشان نحقق أكبر قدر من اللي عايزينه؟او على الاقل نحقق الضروري منها؟
هقترح حبة حاجات شايف ان "ضروري" كل واحد فينا يساهم فيها ، وياريت اللي عنده اقتراح تاني يزوده
- -الضغط على الأحزاب عشان تفوق من نومها ، لو تعرف توصل لنائب دايرتك او لأي وسيلة ضغط
- النزول للاحتجاج لو وقتك وظروفك يسمحوا ولو مقتنع بالمطالب وامكانية تحقيقها
- -المشاركة في حملات التعريف بالفلول وبتاريخهم الأسود ، ولو بمجرد بوستر او كلام مع الناس في المواصلات ، او تنظيم حملة زي "كاذبون" ضد الفلول ولو على مستوى جامعتك او كليتك
- -المشاركة او دعم حملة اي مرشح ثوري ، ولو بالفلوس أو ببوستر على بوابة عمارتك-توعية الناس عموما ، وإبدأ ببيتك وأصحابك وسكان شارعك
اهم حاجة أنك "تعمل اللي تقدر تعمله" ، احسن ما تقعد ع الفيس زيي وتتكلم عن اللي متقدرش تعمله ، وعن الأحزاب اللي بتكابر ، وعن المسؤولين اللي مبيخافوش ربنا
هما هيتحاسبوا ع اللي عملوه او اللي معملوهوش ، وكذلك احنا
طبعا اللي شايف حاجة ممكن يزودها على الحاجات دي ، يقولها
المهم
